MOUN ANDEWO A (L'ETRANGER) - NOUVELLE EDITION (Grand format)

Moun-Andéwò a

Sé nan lanné 1942 Albert Camus, ki fet atè lAljéri, an koloni fwansé an tan-tala, pibliyé Moun-Andéwò a, an liv ki trapé lamenm an siksé toutwon latè. Sé listwè an boug owdinè, Merso, ki ka risanti lanmanniè lavi-a pa ni pies kalté model sans. Liv-la ka fé lektè-a suiv metpies-li a dépi lè i apwann lanmò lamatè'y jistan lajistis kondané'y poudavwè i tjwé an Arab asou an plaj Aljé. Konpowtasion Merso ka sanm ta an moun ki anfouté siyak lavi, ki ka pwan tout sa ka rivé'y épi menm kalmisiré-a, kisiswa nov ki bon oben nov ki mové. Sé dayè kon sa i rivé tjwé an Arab i pa té könnet nan pies kalté manniè : sé épi Rémon, an kanmarad Merso, Arab-la té trapé bab. Lè zot wè yo mété Merso lajol, abo senk mwa fé tan pasé, i di avoka'y kon sa ki sa pa ta terbolizé'y, ki léta-a i adan'y lan pa ka jennen'y vréman. Finaldikont, pwosé-a ka fet ek, apré dives témwayaj ki ka akizé Merso, sé jij-la ka kondané'y a mò. Sa pa ka fé'y ayen non pii ! Liv-tala, Moun-Andéwò a, vini ka riprézanté an nouvo filozofi éti Albert Camus sé met-a-manyok li, « la philosophie de l'absurde » kivédi filozofi lavi san douvan ni dèyè.