Louké (Grand format)

Louké

Anfi-anmizi sosyété an nou la arèsté pwodui pou dévlopé sa nou pé kriyé « labitid konsonmé san travay », lèspwi a onpil moun koumansé chalviré pyé pou tèt. É sé asi sa Vali ka fouté.

« Sosyété a konsonmé san travay » sé fwè jimo a lèspwatasyon a pèp gwadloupéyen : bèl vwati, bato pou pwonmné, dènyé modèl a tout bèl-bèbèl, eks... Vali ka montré on chofè ki ka goumé épi on dòt, davwa loto a tala bay ta'y... on ti griji !

Mi bab ! Konsidiré lavi a on nèg té tini mwens valè ki on mòso fé penn. Davwa alantou a tousa, travay a fengnan, lajan san fòsé, malovant a achté ka pòté vyé mès, vyé moralité : lè'w gadé vorasité a détwa, ipokrizi é sitou jé bésé.

Sa ki bèl osi an penti a Vali, i pa ka férné zyé asi jan pèp a'y ka palé, tanto kréyòl tanto fwansé. Vérité pa ka manti, Vali ka rèspèté sa i ka tandé, sa i ka vwè an wòl é plas a sé dé langann-lasa an sosyété gwadloupéyen-la. É, an finaldikont, kon po a fouyapen ka kouvè kannari asi difé, Vali vlé ban nou fòs é kouraj pou nou dévlopé langann kréyòl an nou pou nou pwan labitid li'y é maké'y. Mi sé sa Louké : apa ti chodyè !
Titò Déglas